Shighamba shaLiparu lyaMaria Elisabeth Katiku Likoro waJosef Kandjeke waHompa Nyangana wavo naHildegard Ngonde waKushokosha.

KaNdonda kakuhamena vakurona vaMaria Katiku Likoro.
1. Vashe vaMaria Katiku Likoro kwakalire Joseph Kandjeke ntjiraura yaNkuruhompa Nyangana waMukuve washirongo shaGciriku. Ghuno kwaya mushampurukire muruku rwaunkwati waVita vyaLishora/ vyaVarwa ndi Vatjawana (vavene ashi Batawana) vatundiro kushirongo shaDaureni shina yuvhiko ntaantani ashi Botswana mumwaka wa1894. Ano munyima yamfa davawina damutininiko, nkwirikwendi Kandjimbi kaMushondo mpo aya mudamunine na valikoro lyendi vamwe ayava twara nkoko kuDaureni oko aka tjwayukilire. Makura ghuno Kandjeke vasha vaMaria Katiku Likoro nko ngoli vaka kulilire na kayimbirako kadidi shure nkoko kuDaureni ndi kuBotswana. Ano opo vana yendiko kumudingu vaHompaghona George Mukoya nankwirikwendi Hompa Tjimi waKandambo naMakanga mpo vana ka mu wana Kandjeke ana kuru. Pakavyuka mpo vana ya timwitiri nkwirikwavo Hompa Nyangana ashi “monoye Haididira ndje Kandjeke ka tu ka muwana ana kuru, mpwali kwandjegho nkwirikwendi Kandjimbi kaMushondo”. Hompa Nyangana mpo ana tukuka na kughamba ashi “muna hepa kuvyukirako ngamu kamushimbeko. Kamutantera ogho nkwirikwendi ashi vashe navo vana mururu ngoli, navo vana shana vaya mukurerepo. Avanya vaTjimi nashimpumba shendi Mukoya mpo vana kwata nka ukambe varonde nakuvyuka kuDaureni kwaKandjimbi kaMushondo va ka tape mbudi yakutunda kwaHompa Nyangana kumwe na mpaku yaghuta navimwe weyo. Ano ghuno Kandjimbi naye kapi nka a ka tuliremo mema ghamapyu nampiri ngoli vadilire kukuyuka mundiro kutundilira pamfa yamumbanda wendi vawina vaKandjeke ndje Kayana nayavankadona yendi, vaNandjeva naKatiku. Kandjimbi a ka ghamba ashi mwanuke kwakara paviri ame nakuvhura ashi ashi nimushweneke. “damunenu mutware kuvashe.” VaHompa Tjimi nashimpumba shendi George Mukoya waKandjimi mpo vana karondeka Kandjeke pankambe ntjo shimwe shakurambita vakonke ndjira yakutamba Mamono kumbara yankwirikwavo Hompa Nyangana. Vaya mutikitire mumpopa mwene ano Hompa mpo aya hafire ghunene ngudu. Ano opo a mumonine muruti Pata Bierfert ndipo ashi Muruti Djami ashi oghuno Kandjeke ayivako hasha kutjanga nakuvarura mpo a manutulireko naye twendi kumushonga ano mumwaka wa 1925 mpo a mutumine kushure yaumitiri yaKatolika kuDӧbra yakaro pandje yaVinduka. Opo a ka manine shure yendi mu 1929 mpo ana shongo pamukunda waNyondo muulinyondo linya lyalinene. Mumwaka wa1932 muruku rwapo vana katundako kumbongi yayipe yaShambyu vamitiri vendi vano vaviri, Alfons Shinkanda Haushiku (1930-32) na Karl Muranda waShitemo (1932), Muruti Bierfert wambongi yaNyangana mpo ngoli ana ya tumuko nka mitiri wendi, Josef Kandjeke. Mbongi yaShambyu kwayitamikire mumwaka wa1930. Kutwara muvitjangwa vyavaruti ashi Josef Kandjeke kwa ya maninepo nkani mukuronga nakuvatera muruti, Pata Franz Marx naswesta Leopoldine ndiposhi Ntine muviruwana vyankirishe navyalipata lyavanambongi. Lihudi lyalinene Mitiri Josef Kandjeke vasha vaMaria Katiku Likoro ava dohoroka mfa dakantjika mumwaka wa1943. Kandjeke kwakalire mukandjadi.

2. Ano vawina vaMaria Katiku Likoro kwakalire mbo Hildegard Ngonde waNdungati na Kushokosha. Ushiri wapo, mwene-mwene ndi waHompa Tjimi. Vawina vaNdungati ndje Kandambo navanyakulyavo, opo vakugaunukire na vaHompa Mushingankuru waShambyu makura vavo ava katunga ngoli pamukunda waNyondo. Opano mpo vatungire shirugho shashire ngudu, nampiri opo kayendanga a ka vadingure ogho timbilyavo Hompa Mbambangandu wakuhova waShambyu, kakutangangango ashi “Shinguruve shaMamono, ukekete wagumba”, vavo ka va wana mpopo paNyondo. Navantje va ka Kapinga kaMwalye na va ka Nyumba yaRukunde. Nampiri opano atjwayukilire Hompa Liwaneka lyaMatunga ndipo vavene ashi Lubosi wa VaLozi mumwaka wa1884/85 nakukwavo nko aya nyotomanine kadidi paNyondo. Vamwe ashi Liwaneka kwatundakanine Vakankora. Ano Hompa Nyangana mpo a tokominine mumundi munya a kwaramo, nyokwavo ghumwe walidina lyaMakena ntani nka aka tingira nka mumandi ghavankora vamwe. Vino kwarenkitire ngoli valipata lyavakankora paNyondo vaka Kandambonkuru vadiruke vakatunge kumwe naHompa Nyangana mumbara yendi paMamono. Napo vana kateketa nka kumwe namugholikadi Nkayira vayende kwatimbilyavo Shikombero kuMashemeno kuKwitu vavo navantje moomo. Liteketo lyavo lyayuvhikwa murushumo rumwe rwamushambandonga ashi “Vakamukoko vagova, vashimbira nkuta muwato, nakakumba kautura.” Vamwe ashi kwatundilire pamfa datimbilyavo Kandandu a feliliro mfa damutininiko pangomba dandjambawe paKangweru para panya ana kara Timbi Thadeus Mukoya waHamberera. Ano ovyo ana piri ngoli Nkuruhompa Nyangana mumuliyuva 23 Shindimba 1924 vitemba mpo ngoli vina haragana. Va ka Nkayirankuru ava nyotomana kadidi paMukekete, ana Hompa Kughoroma nkeheliyuva naNkambe ana katika ashi a pinge nka Nkayira, mugholikadi wankwirikwendi Nyangana. Oghunya mpo ana haruka ashi omo umpinga nka ne weni, ovene wahovire kukwara monande, Shikonga. Mpo vana tjwayuka nka vakatunge kuurundu waKangweru kulikora lyaMahina. Ngoweyo-ngoweyo dogoro vana katunga ngoli paMungoro ndi Katere opo ana kapilira ngoli Nkayirankuru. Ano vano VaKandambo vawina vaNdungati mbyo vana vyuka ngoli kuNyondo yavo.

Likukwaro lyavakurona vendi.
3. Kumeho yakurenka ashi Josef Kandjeke vamutume aka shonge shure KuShambyu, Muruti Bierfert mpo ana ghamba ashi nakuwapashi mitiri a ka kare kunya kuShambyu ghuye kuno mudike. Ano vano vakashe, George Mukoya mpo ana shapuka a yende kuNyondo a ka mushanene mukamali, a ka damuna ndjegho mona Nkwirikwendi Tjimi, mpo a mupire a kware. Opo va tundire vaKandjeke namukamali wendi Ngonde kuNyangana va ya tameke kuronga shure pamishiyona, pamuhovo paGhuvhungu-vhungu ntani ngoli paShambyu vavo okuno shimpe kapi vakuvelipa. Ano vavo vanayatungu ngoli paUtokota, mumwaka wa1937 mpo karunga ava pireko mukeke wamumati walidina lyaGeorge Nyangana. Muruku rwapo Ngonde vawina vaMaria Katiku mpo ana ya vyuka nka kuGciriku va ka muvetere ngoma dashikavedi. Oghuno ngoli tuna kulira mpo vaka mushampurukilireko kuGciriku pamukunda wa (Yaro ?) muliyuva lyaviri Nkurumuronga mwaka wa1939 (02 February 1939). Makura Muruti Pata Djami ndipo ashi Bierfert mpo muyoghire muukriste muliyuva lya………………………….Muruku rwapo mpo va ka vyukire ngoli kuShambyu, kuUtokota. Ava ya tungu ngoli paShambyu, Utokota dogoro mpopo vana yawanenepo nka vakurona vendi mwanuke wautatu walidina lyaMartha Runguro mu 1941, mumwaka wa1943 mpo ngoli a dohorokire shavo Kandjeke, makura nyokwavo a damuna twana twendi vavyuke ngoli kuNyangana. Opo va ka tikire, ka wana nyakulyavo Makenankuru, mukada Hompa Nyangana kuna kuvera lighuru. Oghuno Maria Katiku waKandjeke mpo a ka shighukire navanyakulyendi vavyuke kuShambyu. Ava ya pitakana nka nandjegho nyakulyavo Makenankuru kuMupini. Makenankuru, mukada Hompa Nyangana paMupini a ka dohorokera kuva vakwendi nakuhoreka mpo va ka muhoreka mpopo. Muruku rwamfa davanyakulyendi paMupini, Maria Katiku Likoro mpo a ka vyukireko, aya kara ngoli kwamukurwendi Elina (Liina) (?) Kunyanda paShambyu. Munyima Hompa Shashipapo mpo ana ya mushimbi po paShambyu, nakumutwara a muvyute kuGciriku kuvawina Ngonde.

4. Ruvede oro nyokwavo ghuye ana kara ngoli munkwara naKamangu waShihupa. Ano muruti opo a pulidire ashi kuninko vana vaMitiri nakufa Josef Kandjeke, vakaromo-romo mpo vamutantilire ashi mpovali panya paShawato kwaKamangu ogho a kwaro nyokwavo. Muruti mpo ana shanyuka na kutakuma ashi “Nanne! Nakuvhurashi vakare kwanganga.” Makura Muruti mpo a tumine ngoli Musenge, muunya nka Kamangu, a fumanino ashi Mbiriha. Ghuno karuwananga naburuta Hutu (murwavo ashi Anhuth) mukudika ndjugho pamishiyona. Makura ghuno Mbiriha mpo a ka vashimbire na mukurwendi George Nyangana. Muunyamuntu Martha ndje va ya henitireko vawina Ngonde va ya mutware nka musheli. Ano Muruti ava ghaningida ashi nakadidishi nka kakuyenda musheli ashi vakatungemo. Ano vyaushiri, ghuno Maria Katiku kapi nka a vyukiremo. Ka karanga tupu pambongi yaNyangana, nampiri ayi pata shure muruti ka vakondanga va kare mpopo pambongi. Kumwe namukurwendi George.

5. Opo vakulire kumwe navaunyendi, mumwendi waNovember 1953 mpo ngoli vavatumine va yende kuDӧbra. Shure yavo paDӧbra kwa ka yi tamikire ngoli mu-26 January 1954. Va ka wanine ko nka va kaNyangana vavamati vavandambo murongo, ano vavakadona vanne. Vagenda hambombali, kuvapakerera ngoli navantje vakaNyangana ava ka kara dimurongo mbiri naumwe. Kutanta ashi vamati murongo navanne ano vakadona hambombali. Mu-25 January mwaka wa1955 shure ya vakadona-kadona ayi paturuka kumishiyona yaKatolika yalidina Waldtfrieden. Vakadona navantje nko va va dirwitilire ngoli.

6. Kumeho yavo mu-1952 vahovire kuyendako kuDӧbra vakadona vakutunda kuNyangana kwakalire vanne. 1. Regina Nankali 2. Wilhelmine Maguru 3. Fillomina Mudi (ana karo weno Mugholikadi washirongo shaGciriku, mukamali waHompa Kassian Shiyambi) 4. naAngela Nyama. Mbo vakadona vakuhovererera kuyenda kuDӧbra vakutunda pambongi yaNyangana.

7. Ano mushiyenda sha mu-1953, kwakalire ndjeghuno tuna kulira Maria Katiku, kumwe narukwaghedi rwendi Cecilia Nangura wa Bartholomeus Murora mukamali waMitiri Karl Peter Shiyaka waMberema naRosa Vihemba wa Aloys Kangoro (monavo). Vakadi vatatu. Varume kwayendire nakufa Bonifatius Ngandu wa Hompa Shashipapo, nakufa Leonard Hamutenya waJohannes Ntjinano, nakufa Aloys Kakuru waGeorge Mukoya, ntani na mitiri nakufa Werner Nkumbwa waNdonya. Varume vanne.

8. Ruyendo rwavo kwakalire weno. Vavo kwashapukire paNyangana mu-28 November 1953 ava ka rarera paShambyu. Mu-29 November 1953 ava meneke ava ka rara paMariabronn. Mu-30 November ava meneke nka ava ka rarera ngoli kuDӧbra. Ndjira yakukonauka mundonga: Ncaute-Karukuvisa – Kano Vley-Musheke wavaruti-Nuragas ndi Kamukaru, ogho ana karo ntaantani ashi Maroelaboom, ntani Grootfontein.

9. Mudiru wakutunda palivhu. Pashiyenda shavana-Dӧbra vamu1953, naumweshi ngoli ana hupo po. Weno va kukwama: 1. Bonifatius Ngandu 2. Aloys Kakuru 3. Leonard Hamutenya 4. Rosa Vihemba 5. Cecilia Nangura 6. Werner Nkumbwa 7. Ano Maria Katiku ndje ana yakumanito po pambunga yavo.

10. Vavo pa Waldtfrieden, Vakutunda kuNyangana, mukurona wavo Regina Nankali, mugholikadi wanakufa Hompa Sebastiaan Kamwanga, ndje mwene Maria Elisabeth Katiku, Wilhelmine Maguru waKarwapa mukurwa waNnaMaria mukada nakufa Wigbert Kalyangu na Josephine Mashe mukada nakufa Gottfriedt Munkanda, Cecilia Nangura mukada Mitiri Karl Peter Shiyaka, na Rosa Vihemba waKangoro.

11. Vambukushu kwakalire; ogho ka katwenyanga oghuno tuna kulira ashi monendi Emma Kanguro, Herekadhi washirongo shaMbukushu, mukada Fumu Alfons Majavero, Hermine Thituro, muunya Fumu Majavero, Chrysanta Kayana, Theresia Tumonene mona Fumu Makushe, Ludmila muunya Shamakere na Eugenia Kande.

12. PaShambyu kwakalire; Nankero Mukada nakufa Marcellius Mudumbi waKudumo, Ingridt Katiku, Blantine Nangurohi, Emmilie Katendo, Magdalena Karumbu, Swesta Mechtilde Makena, ntani na Theresia Makena mukada Kangowa.
13. Va ka Bunya kwakalire, Swesta Benedicta ayivikwiro pakare Theofilia Shimbara, Eleonora Runguro na Maria Mate.
14. KuTondoro kwatundireko Virginia Wayera navamwe nka.

15. Makura ovyo ghuna yamo mwaka, mpo a yendire ngoli Muruti wavo nakufa Pata Baetsen. Mpo ana ka va renka ngoli ashi. Regina ghuna hepa kuyenda; vyoye ana kura ngoli ana shana nkwara. Maria ghuna hepa kuyenda; vyoye ana kuru ngoli ana shana nkwara. Ntani nakufa Wilhelmine ghuye kuna kuvera ngoli uvera waTB va ka mukwatikire kuUsakosi. Ntani na Maria Mate wa kuBunya. Mpo va ka ghurumukire ngoli va ka ye kuno kushirongo.

16. Mpo ngoli va ya kalire paMbongi yaNyangana. Vavo kava karanga vaviri namugholikadi Regina nandjugho yavo. Ano kuno vakadona navantjeya kava raranga munya munkirishe yakare ashi Kapela. Yavo kwakalire nkonda kundjugho yavaSwesta. Makura kavaruwana pamwe kavatera kushipangero, pamwe kutunga ngoli viturumufe vyavaruti navaburuta. Ngoweyo – ngoweyo dogoro rwatikiremo ruvede rwakuvatjanga ashi nga va vakwareke. Ano Muruti mpo ana ghamba ashi “likwareko lyavano kapi tuna kulirenka yira moomo twakwarekanga vapika.” Ashi lyavo vakare tanko vivike viviri vyakuvashonga nakuyimba shishongero. Makura liyuva lyakuvakwareka kwakalire weno Maria Elisabeth Katiku nanturaghumbo yendi Thomas Likoro, mukurwendi George Nyangana namukamali wendi Victoria Napemba, Hompa Sebastian Kamwanga namukamali wendi Regina Nankali, Stanislaus Mpande namukadendi Charlotte Mavandje, Katekete Norbert Haushiku namukadendi Ludovica Ntjekurure.

17. Opo lyatikiremo likwareko lyavo mu 19 June 1956, ava ka yita ngoli nakufa Fumu Alfons Majavero, okuno ghuye shimpe mitiri tupu, ghuye shimpe kapi ana ngene muuhompa. Kavetanga ngudu ngongi. Aya vavetere ngoli. Ntani nanakufa mitiri ogho varundumwine ashi Katjeuka, mwene ndi Andreas Haingura Kandjimi. Mbo va ka kaliro ngoli vakuveta musica palikwareko lyavo. Mbo vakuhoverera muGciriku kudwata vyavikenu palikwareko. Ndi mbo nka va varekiro kudwata nkaku palikwareko.

18. Likwareko lyaMaria Elisabeth Katiku nanturaghumbo yendi Thomas Likoro kwaka linwenighine muMayeye kuvawina Ngonde mumundi watimbilyavo Shikukunkuru. Nyakulyavo Hompa Kamutuva paShikekete kwatapire ntjako damahangu ntani nyakulyendi Hompa Shampapi Kughoroma naye kwatapire ntjako damahangu. Vamukwarero vaMaria navo ava tundu kuMabushe ava ya kulifeste.

19. Makura opo vapwire kutjanga, Muruti Pata Schlag afumano ashi Shiraha a renke ashi ove Thomas ogho mukadi nakumutwarashi kulivara kulikoro lyoye, morwa nayuvha ashi vasho ne nganga. Mpo ashi ghuna hepa kumudikira a kare pamishiyona ndipo pepi namishiyona. Makura nturaghumbo yendi Thomas mpo a ghambire ashi nakuwapashi nka ashi tukare pamishiyona, nkwandi tukare tupu ngoli pepi nambongi. Makura mbyo ngoli vakatungire mpopanya paKangweru, opanya a ka dikira nka monavo Eveline Nangura ndjugho yendi. Muruti Pata Shiraha mpo ana kutu nakufa Kornelius Sharumbongo ava dikire ndjugho yavo. Kwayidikikitire kungenya namborongondjo. Munyima ntani mwene nturaghumbo Likoro ntani ana dikipo ngoli damunoko wakushora ano kuwiru mushoni. Mundi wavo kwakalire wakupinaura shiri lirapa, wakurenka ashi ntjene kulipata una kara, mugenda nkwandi a pinauke shiri ntani ana ka muwana.

20. Omunya mushipata vana yatungu vaNnawaSteyini mo ngoli mwakaliro yira lifuva lyavo lyamuhovo. Makura muruti ava tuliriko ngoli yinya ndarata. Makura vamitiri mundi wavo aghu karere ngoli kunya a karera mayendo ghakare. Kwakalireko Mitiri Sylvester, Venantius Munango, Andreas Haireka ndipo ashi “Die Ou”, naSebastiaan Kamwanga. Makura oghuno naSteyini naye a putura shipata shendi vakunungikire ngoli. Munyima mpo ngoli vana putura lifuva lyavo kutunda panya ana kara timbi walikuto Thadeus Mukoya shikandwite dogoro pepi nokunya yina kara Nkirishe yaELCIN. Nalikwafo lya vanambongi ntani navo ka vatundako mulimbaranda vaye kushipangero ka va limanga nakughadaya shiri ngudu Mahangu.

21. Oghuno Shashipanga mpo a tundire ngoli kuGuma, pamuhovo kwakalire kumukwarero wendi ku va ka Shitapo ntani kuvakashe va ka Shakanango, a ya vawana ngoli. Athanasius naye a kwara na mukadendi Astridt Kandambo, naye a ya vawana, ava ya kara ngoli vatatu. Mpo vakalire mandi ghavo vaburuta navakadi vavo ghakukundame ngoli ano lifuva lyavo pakatji makura kusheli kunya kumayendo mandi ngoli ghavamitiri.

22. Mpo vakalire ngoli mpopo paKangweru mwaka dangandi. Munkwara daMaria Elisabeth Katiku naThomas Likoro waShashimwantjura ndje Kalipa, vavo paKangweru Karunga-Shankendengere kwa va yakireko vana vano. Mu mayuva 15 July 1957 mpo ngoli vawanine mbeli yavo ogho vatire Annafrieda Numba. Mumayuva 29 May 1960 mpo vawanine shikwama mbeli shavo ogho vatire Eveline Nangura. Mumayuva 13 August 1963 ava wana ngoli monavo wautatu, Erwin Stefan Kalipa. Mumayuva ……July 1966 ava wana monavo waunne ogho vatire Edward Jacob Gcunda.

23. Ano muruku rwakuyita ngoli monavo waunne mumwaka wa1967, Hompa Shashipapo mpo ngoli a shanine liyoghero. Opo a monine ashi mukurwendi Hompa Shampapi ndi Kughoroma ana wana liyoghero, naye mpo a valikire kuyimba shishongero shaliyoghero. A kombo mukadendi ogho a hupiro po, Kayando, a ka ghupa Namutenya.

Opo a shanine liyoghero mpo ngoli a tumine mupolisa wendi Musiporo ndje Katembo. Ameshi vapolisha vendi vavanene kwakalire Ndjirakalimi ndje Haindaka, Musiporo ndje Katembo ano ghuno Muyeghu-Shakashivi ndje Lighonga. A tumu po ngoli Musiporo Katembo ashi kayende kwaNanneghona ashi ndje ngayimaneno mukadande paliyoyero lyande. Oghuno tuna kulira mpo a ya tukukire nakughamba ashi “amene shimpe nimwanuke nakuvhurashi niyimanene Hompa, vatekuru vendi vamwe vavakurona yira vaShaKanango ne mpovali ndi mbo ngoli ana renke ndi hasha.” Ano opo ana kaviyuvha Hompa Shashipapo mpo ana kakushapukirako mwene pakakambe kendi kakakenu. Opo aya tika, kwayuvhako tupu; Nanneghonee!, nanneghonee!, ano ghuno tuna kuvhuruka ashi; mangwee! Ashi yiyenu tupu. Hompa mbyo ana ngene ngoli mumundi wavo. Mbyo ana ghamba ngoli Hompa Shashipapo ashi nanneghone ovyo kamuyashwenene ngoli kuyimanena ngumwenyenu ne vinke? Ghuno tuna kuvhuruka ashi ovanya ka tu yatwenya ne mbo ngoli vana kukupaso kumuyimanena. Ano Hompa Shashipapo mpo ana tanta ashi ghuye kuna kukwata mulipindi kundereko naye peke, nkwandi ndje wakuvayimanena na mukamali wendi. Ano wakumuyimanena mwene nkwandi Leo Ngandu. Mumavhumbukiro, gha26 March 1967 mpo ngoli a wanine Hompa Shashipapo liyoghero nalikwareko namugholikadi wendi Anna Maria Namutenya. Ano ghuno Maria Katiku kumwe na Leo Ngandu ava kara ngoli vayimaneni vavo.

24. Vavo shimpe pa Kangweru mpo ngoli vakuhametilireko kumbunga yakurwera limanguruko yaSWAPO. Kumwe nanturaghumbo yendi Thomas Likoro ka va neghedanga nakutindikida vakuyenda kuZambia kwaSWAPO ndjira yakukopwera yalimbaranda kumwe nava ka Angola ka vatundilirango mulimbaranda vayekushipangero kwaDokotere Maria Fishe.

25. Mumwaka ngoli wa1968 Nturaghumbo yavo Thomas Likoro mpo ngoli ana shayeke viruwana vyauburuta ndi ukarupinderu pamishiyona yaNyangana mulidiro kukuyuvha naMuruti Duttmann. Ava dirukiri muShipakupaku kwashavo Pius Mukoya na Kandjeke. Omunya mo ana ka va yakako nka Karunga monavo wautano, mu mayuva 28 May 1968, Vincent Kapumburu. Lishampuruko lyendi mushipatera shaNyangana. Mwaka mbiri tupu va ka kaliremo makura mu mwaka waMataratara wa 1970, mpo vana katundamo muShipakupaku vadirukire ngoli kuMabushe. Ano mu mwaka wa1971 mpo ka ana shapuka nturaumbo yavo a ka shaneko viruwana vimwe. Ngogho mwaka mukada muntu naye aghu muwana nka uvera wangera. Ava kamukondera mushipangero shaShambyu. Ava kadiyamamo nka kumwe namonendi Annafrieda Numba ogho kakadanango nakukwaterera muunyendi Vincent Kapumburu.

26. Ano mumwaka wa 1972, mpo ngoli vadirukilire muRundu, morwa nturaghumbo ogho a kaliro karupinderu ndi meserare kwayawanine viruwana kulipangero vyakudika ndjugho dino damuSafari. Ava kara kadidi pamundi waThomas Mangundu Kushokosha ntani vana vapako ndjugho, omo vatungire navana vavo kumukuro waSafari pepi naAntlantic Fish Market.
27. Ano mumwaka wa 1973, mpo naye vamukutire mulipangero mushipangero shaRundu. Pamuhovo kuKambisa munyima ava mutjindjiri kuLaboratorium. Ano mu1975 mpo vana dirukamo ngoli muSafari vaye va ya tunge muNkarapamwe. Omuno mo nka wa ya vayakireko Nyambi monavo wauhamboghumwe ogho vatire ashi Joseph Kandjeke (afumano ashi Mpuku) muliyuva lya 16 November 1975 ntani muliyuva lya18 May 1977 mpo vana wana ngoli ntjiraura yavo kumwe nanturaghumbo yendi Thomas Likoro ogho varukire Laurentz Mushishi (ayiviko ashi Bobby).
28. Muliyuva lya22 October 1980 mpo ngoli Maria Elisabeth Katiku na nturaghumbo Thomas Likoro waKalipa davagaunwine mfa yira moomo vaghanine mumughano wavo wankwara ogho vatulirepo muNkirishe yaKatolika paNyangana muliyuva lya 19 June mu1956.

29. Ano mumwaka wa1984 mpo ngoli vana wanako nka ghunyavo ghuno vana shungiri naye mwaka nadintje dino walikuto Lazarus Kandundu. Nkeheghuno ava kengo ashi vavo kapi ka va kushuvanga nanturaghumbo yendi. Kukare ashi kuBetjwana vana kuyenda kuvakalikoro ndi, ndi kuEuropa kushirongo shaAustria nakuRoma kwamuunyavo Ambassador Simon Madjumo Maruta ndi, ndi kuVinduka kwashipumba nturaghumbo yamuntu Lazarus Kandundu, Mufumadekwa President washirongo Hage Geingob ndi? Ndi nampiri kuviruwana vyavo na kumauvera ghavo kuvipangero kumwe ka va karanga. Muliyuva lya 5 September 2012 vavo kwakundikire shihoro shavo kushipara shaKarunga munkirishe yaKatolika muShivanda.
30. Mu mwaka wa1994 mpo ngoli navo vana tameke viruwana vyaunafarama odo vawanine mumwaka wa1992.

31. Ano mumwaka wa1996 oghuno tuna kuvhuruka mpo ngoli a tuliremo lipwiyumuko lyakukuvinduka muviruwana vyendi vyamushipangero mukonda yalighuru olyo ka takumanga.

32. Ngogho mwaka opo vana wana kapentjuyuni kavo makura mpo va ka mborolire ngoli pomba pafarama yavo. Ovyo vyakaliro ashi ndje mugholikadi wakuhova kumborora mbora muGciriku. Ano yino mbora yendi yavatelire ghunene ngudu vana farama ovo vakundaminoko, ovo vakaliro ashi shimpe kapi vana kara namema. Ntani ava taura nka shitaura kumwe namonendi Numba. Shitaura shamuwiya shakutundilira kufarama yanturaghumbo yendi Lazarus Kandundu yakaliro muwiya waShambyu osho shayendo dogoro kuNanava kufarama yendi muwiya waGciriku. Namuntji vantu navantje mo vanakushinga mahauto ghavo.

33. Maria Elisabeth Katiku waKandjeke wavo naNgonde kwakalire muntu ogho a yiviro ngudu na kukwatakanita likoro. Ghuye kapi wapakire ashi oghuno nkandi ndi oghunya ntjivi ano ghuye valikoro navantje kwavashetakanitire nakuvapa shihoro ntjosho shimwe tupu. A yivire kushepa, kulya nakunwa navantu, vakare ashi valikoro ndi walye vaholi. Nka kwakalire muntu wakutapa mayere namanangwiro kuvanantjoka ashi weni vakara navaunyavo ndi pamapata ghavo. Mumwaka dendi dino daukurupe ana kara ghunene nashinka shakupongayika vyakuhamena vitimwitira vyalikoro, vyashirongo shaGciriku nashaShambyu navyaKavango mudima. Mundjugho yendi muna kara mbapira dakukushuva-shuva odo a pongaika.

34. Ano kutunda tupu dino mwaka da 2000 navihupe Maria Elisabeth Katiku waKandjeke naNgonde kwaghongeka ntekuru daNkuruhompa Nyangana nadintje, nashitambo shakupongaika kashiringa vaghure liwe lyapambira yanyakulyavo. Ano mu23 December mwaka wa2017, shitambo shendi mbyo kashitiki muuta wakora. Weno pambira yaHompa Nyangana pana kara liwe lina fughuro.

35. Ano yira liwiru lyakumbanduka, muliyuva lya26 Nkurumuronga (February) 2018, wetu ghuno Maria Elisabeth Katiku Likoro waKandjeke kaHompa Nyangana na Hildegard Ngonde, mpo ngoli ka tu shuvu mushipangero shaRhino Park, muVinduka. Lidina lyendi lyakumutangita ndje Nahambo Mukukira.

36. Ghuye kuna shuvu vana vendi hamboghumwe (6). Ghumwepo a mupitira kumeho. Vatekuru dimurongontano namvyu (59), vatekuru-nkokona dimurongo-mbiri nahamboghumwe (26).

37. Ghuye kuna shuvu nka vaughuni vendi vaviri, Martha Runguro waKandjeke ntani na Ambassador Simon Madjumo Maruta.
Karunga ndi a pwiyumune monyo wendi mumpora!